Ngaa padayun kita nga nagahigugma?

Ngaa? Bisan pila na ka beses nga nabigo, nga nasakitan? Kalaw-ay pa naman sang pamatyag nga ikaw gin bayaan sang tawo nga tuman mo guid nga palangga. Ako, sang una nga beses ko nabatian nga indi na niya gusto nga mag-padayun pa ang amon relasyon, daw indi ako kaginhawa. Nagpin-ot ang akon dughan. Sobra kasakit sang akon nabatyagan, daw indi mag-untat ang mga luha. Pila man ka oras ang akon pag-hibi, asta mag-gabi kag asta nag-abot ang sunod nga adlaw. Abi ko wala na ko may ihibi. Pero sa sunod nga gab-i, pagkatapos sang isa ka adlaw nga paghimakas sa akon ulobrahan, pagpuli ko sa balay kag nakit-an ko ang katre nga wala mahimus, nadumduman ko liwat ang natabo sang kahapon kag padayun ako nga nag-hibi. Isa ka tuig man ako nga nag-antus pero wala man ako sang iban nga basulon kung indi ang akon lawas. Kahuluya pero padayun ako nga nag-laum nga magbaylo ang iya pinsar. Galeng, kung kaisa may mga bagay nga indi na pwede ibalik  bisan pila pa ka pangamuyo ang imu ihalad.

Sa tanan nga kasakit, mabalik kita sa palamangkutanon kung ngaa padayun kita nga nagahigugma. Simple lang. Masadya ang may ginahigugma. Pero mas masadya kung kamu gahigugmaanay. Lain guid man kung may isa ka tawo nga nagapalangga sa imu. Ang nakaintiendi sa imu, ang ara lang dira kung kahinanglan mo. Syempre, dapat ara ka man para magdaho sang imu suporta kung siya naman ang may kinahanglan. Dapat patas ang pagpalangga ninyo sa isa kag isa. Patas ang paghatag kag patas man ang pagbaton. Amu ina ang paghigugma. Indi kahinanglan sa tanan nga oras masinadyahon. Ang importante handa kamu pareho nga antuson ang kung ano man nga problema nga maabot sa inyo pangabuhi.

Para sa akon, nga isa ka tomboy o lesbyana, indi ko mapunggan ang mga palamangkutanon nga... ako ayhan makakita sang paghigugma nga lubos? Nga kung may isa ka babayi sa bilog nga kalibutan nga palanggaon ako bisan  ano ako ka suplada, artehan, alabuton kag kung kaisa mabudlay intyendihun? Kag kung mag-abot man sya sa akon kabuhi, kami ayhan magadugay? Indi ko mapunggan ang mga palamangkutanon nga ini tungod ang paghigugma sang mga lesbyana wala gihapon ginakilala sang sociodad bisan ano pa ka moderno ang panahon sa subong. Kag siguro, bangud nasakitan guid ko sa natabo sa una ko nga relasyon, nakulbaan man ako siguro magpalangga liwat. Basi indi ko na kayanon ang masakitan liwat, ang pamatyag nga daw gin labo ka sa tagipusuon.

Pero bisan amu ini ang akon nabatyagan, indi ko kahulat nga may makilala nga babayi nga tani magbag-o sang akon panumduman. Ang maging instrumento para ako magpati liwat sa kakusog sang paghigugma. Gusto ko maging masadya liwat, ang mabatyagan ang haluk kag hakus sang isa ka babayi nga palangga ako kag ang palanggaun ko man sang matuod. Pero bag-o ko ihatag ang pagpalangga ko sa iya kung siya mag-abot, importante nga ibalik ko ang pagpalangga ko sa akon kaugalingon. Tagaan importansya ang kalawason kag maging malipayon bisan naga-isahanon.